二十五歲之後飲杯水都會肥呀！
記得喺廿五歲之前聽過一班姐姐同我講呢句說話；到而家就輪到我成日同番班細嘅講。人愈大就會發現「卡路里」呢三個字比起「我愛你」更震撼更驚心動魄！
戀愛同食野一樣，大家都曾經不顧一切咁瘋狂過。有啲男人你明知佢係高卡路里對身體冇益... 咁點呀？我真係好愛佢呀！當你瘋狂咁鍾意一個人嘅時候眼中就只有佢，你唔會再去理會啲咩贅肉咩高膽固醇，唔會理啲朋友阿爸阿媽點樣勸你，我就係要食！你追求嘅可能係一刻親密嘅快感又或者其實係一啖氣；總覺得食肥左咪遲啲減番囉，總覺一句"life is short"有D感情就可以消耗得起。直到有一日你終於覺得好攰，已經再消耗唔起成身嘅卡路里唔再年輕，只想安定渴望清淡... 曾經嘅瘋狂亦已經隨年紀而消失。原來全部好食嘅食物都係陷阱，所有因為衝動而發生嘅感情都只係瞬間。高卡路里非常appealing，低卡淡而無味。究竟係一段感情追求嘅係刺激定係平淡呢？
要做個健健康康嘅女人一定要將放入身體嘅每一樣野思前顧後諗清諗楚，食物同男人都係一樣... 雖然我永遠都唔會忘記triple chocolate cake 嘅好味，但係我而家更加嚮往嘅係清淡嘅桂花糕。#女人像鹽
Search